Քաղաքաշինության կոմիտեում քննարկվել է «Կոմիտաս պարկ» բնակելի թաղամասի գազամատակարարման հարցի կարգավորման ընթացքը
Քաղաքաշինության կոմիտեում այսօր կայացել է «Կոմիտաս պարկ» բնակելի թաղամասում բնակարաններ ձեռք բերած հանրային ծառայողների հետ հանդիպում՝ քննարկելու բնակելի համալիրի գազամատակարարման հարցի կարգավորման ընթացքը։
Քաղաքաշինության կոմիտեի նախագահի առաջին տեղակալ Դավիթ Գրիգորյանը և նախագահի խորհրդական Նաիրի Հարությունյանը ներկայացրել են խնդրի կարգավորմանն աջակցելու նպատակով կոմիտեի ձեռնարկած քայլերը, ինչպես նաև փոխանցել «Գազպրոմ Արմենիա» ՓԲԸ-ից և կառուցապատող «Օրդ Դեվելոփմենթ» ՍՊԸ-ից պաշտոնապես ստացված պարզաբանումները։
Մասնավորապես՝ «Օրդ Դեվելոփմենթ» ՍՊԸ-ն արդեն կատարել է առավել օպտիմալ միացման կետից գազիֆիկացման տեխնիկական պայմաններ ստանալու համար նախատեսված վճարումների մի մասը։ Կառուցապատողի վստահեցմամբ՝ վճարման մնացած մասը նախատեսվում է կատարել առաջիկա օրերին։
Վճարումը կատարելուց հետո «Գազպրոմ Արմենիա» ՓԲԸ-ն սեղմ ժամկետում կտրամադրի գազիֆիկացման տեխնիկական պայմաններ, որոնց հիման վրա կկատարվեն գազատարի կառուցման անհրաժեշտ աշխատանքները:
Կոմիտեի պաշտոնյաները շեշտել են, որ Քաղաքաշինության կոմիտեն հետևողական է լինելու, որպեսզի նախատեսված աշխատանքներն իրականացվեն հնարավորինս սեղմ ժամկետում, և նոր զարգացումների վերաբերյալ իրազեկելու է շահառուներին՝ հետագա քայլերի վերաբերյալ որոշումներ կայացնելու նպատակով։