Հարգելի շինարարներ,
Շնորհակալ եմ  մեր հրավերքին արձագանքելու համար, շատ հաճելի է հանդիպել շինարարության ոլորտի պրոֆեսիոնալ հանրության հետ և քննարկել մեր ոլորտում առկա խնդիրները:
Հավանաբար, դուք տեղյակ եք, որ մարտի 21-ի կառավարության նիստի ժամանակ, հանրապետության վարչապետը խոսելով Ազգային վիճակագրական ծառայության հունվար-փետրվար ամիսների ցուցանիշների մասին` ընդգծեց, որ  գրանցվել է երկնիշ տնտեսական աճ: Միաժամանակ, նա մտահոգություն հայտնեց շինարարության ոլորտում գրանցված ցուցանիշի առնչությամբ: 2012 թվականին մենք առաջին անգամ շինարարության ոլորտում կասեցրեցինք անկման միտումը և տարվա արդյունքներով արձանագրեցինք  աճ, բայց հունվար-փետրվար ամիսներին,  արձանագրեցինք անկում: Ուստի,   կառավարությունը մեր առջև խնդիր է դրել շինարարության ոլորտում ապահովել  տնտեսական աճի ցուցանիշը, որը ապահովելու  համար կառավարությունը ոլորտին պատրաստակամ է ստարել   պետական ծրագրերով: 
Առաջարկում եմ այսօր բաց, ազատ խոսակցության ծավալել, իսկապես վերհանել գոյություն ունեցող հիմնախնդիրները, որպեսզի հասկանանք, թե պետությունն ինչով պետք է օժանդակի, մենք ինչ քայլեր պետք է ձեռնարկենք  շինարարության ոլորտում աճի նորմալ, բնականոն ծավալները վերականգնելու ուղղությամբ: Նման քննարկումների արդյունքում կարող ենք ստանալ հստակ առաջարկությունների փաթեթ: Կառավարության նիստի հանձնարարականի համաձայն, առաջարկությունները կքննարկենք էկոնոմիկայի, ֆինանսների նախարարությունների և Կենտրոնական բանկի հետ, կձևակերպենք շինարարության ոլորտին  պետական աջակցության ձևաչափը և դիմելով կառավարությանը` կստանանք այդ աջակցությունը: Այս հանդիպման ընթացքում, իհարկե, կքննարկենք ձեր բանավոր առաջարկությունները, բայց կխնդրեի դրանք տասնօրյա ժամկետում գրավոր  ներկայացնել քաղաքաշինության նախարարություն:
Մեր հանդիպման երկրորդ հատվածում, նախարարության քաղաքաշինական ծրագրերի իրականացման գրասենյակի տնօրենը կներկայացնի այն նոր մոտեցումները, որ նախարարությունն ամրագրել է մրցույթների անցկացման գործընթացում: Քաղաքաշինության ոլորտում պետական գնումների կազմակերպման գործընթացի նկատմամբ մենք խստացրել ենք վերահոսկողական մեխանիզմները: Քաղաքաշինական ԾԻԳ-ի կողմից կազմակերպվող մրցույթների և շինարարական աշխատանքների  նկատմամբ իրականացվել է ամենօրյա օպերատիվ  հսկողություն,  ապահովվել  է մրցույթների բաց և թափանցիկ անցկացումը, կիրառվում է մրցույթների հայտերի ներկայացման էլեկտրոնային տարբերակը:  Միայն մի փաստ կուզենայի առանձնացնել, 2012 թվականին իրականացված շինարարական ծրագրերի շրջանակներում արձանագրվել է 987.0 մլն ՀՀ դրամի չափով տնտեսում, որը կազմում է ընդհանուր ծավալի շուրջ 15 տոկոսը: Այդ տնտեսումները հիմ¬նա¬կա¬նում գոյացել են արդեն նշածս վերահսկողական մեխանիզմների խստացման,  պայմանագրային ծավալաթերթ-նախահաշիվների ճշգրտման արդյունքում առաջացած տարբերություններից, ինչպես նաև կապալառուների նկատմամբ կիրառված և գանձված տույժերից ու տուգանքներից:

Բոլորիս մաղթում եմ արդյունավետ աշխատանք: