Շարունակվում են իրականացվել Քաղաքաշինության կոմիտեի պատվիրատվությամբ ՀՀ 2018 թվականի պետական բյուջեի միջոցների հաշվին նախատեսված շինարարական օբյեկտների աշխատանքները, դրանցից մոտ մեկ տասնյակն արդեն ավարտական փուլում են, մնացածը շարունակական ծրագրեր են և համաձայն հետագա բյուջետային հատկացումների, կավարտվեն նախանշված ժամկետներում:

Նշված օբյեկտների թվում են նաև ՀՀ Լոռու մարզկենտրոնի Վանաձոր քաղաքում գտնվող տարբեր նշանակության կառույցները՝ Միքայել Թավրիզյանի անվան արվեստի պետական քոլեջը, թիվ 18 դպրոցը, գյուղատնտեսական պետական քոլեջը: Կոմիտեի պատվիրատվությամբ իրականացնում է Մեծ Պարնի համայնքի նորակառույց մանկապարտեզի հեղինակային և տեխնիկական հսկողությունը:

ՀՀ 2018 թվականի պետական բյուջեով նախատեսված աշխատանքների ընթացքն ուսումնասիրելու և արդյունավետությունը գնահատելու համար Քաղաքաշինության կոմիտեի նախագահի առաջին տեղակալ Արմեն Ղուլարյանը, Քաղաքաշինական ծրագրերի իրականացման վարչության պետի պաշտոնակատար Արսեն Միրզոյանն ու ՀՀ Լոռու մարզպետարանի պատասխանատու ստորաբաժանման աշխատակիցները այցելել են նշված օբյեկտներ:

Հաշվի առնելով այն հանգամանքը, որ Վանաձորի՝ Միքայել Թավրիզյանի անվան արվեստի պետական քոլեջի, թիվ 18 դպրոցի և գյուղատնտեսական պետական քոլեջի շինարարական աշխատանքները մեծածավալ են և 2018 թվականի բյուջետային տարին մոտենում է ավարտին՝ Կոմիտեի իրականացվող աշխատանքների մասով տրվել են հրատապ ցուցումներ աշխատանքային և տեխնիկական ռեսուրսներով օբյեկտները համալրելու, աշխատանքների ընթացքն արագացնելու, կապալառու կազմակերպությունների՝ շինարարի, տեխնիկական և հեղինակային հսկողների համատեղ աշխատանքը արդյունավետ կազմակերպելու, ինչպես նաև ընթացիկ նախագծային շտկումները սահմանված կարգով և սեղմ ժամկետներում իրականացնելու վերաբերյալ:

Այցելության օրվա դրությամբ՝ Մեծ Պարնի համայնքի մանկապարտեզի կառուցման աշխատանքները գրեթե ավարտվել էին: Նորակառույց մանկապարտեզի շինարարական աշխատանքներն ընդգրկվել են 1988 թվականի Սպիտակի երկրաշարժի 30-ամյա տարելիցին նվիրված միջոցառումների ցանկում և պետք է ավարտվեն 2018 թվականի նոյեմբերի առաջին տասնօրյակում: