18.01.2017թ.; https://armenpress.am/arm/news/874941/gavari-pettatroni-norakaruyc-shenqy-shahagortsman-khandznvi.html

Գավառի պետթատրոնի շենքի շինարարությունն ավարտին հասցնելու համար այս տարի պետական բյուջեի միջոցներից հատկացվել է 100 միլիոն դրամ: Ինչպես «Արմենպրես»-ին տեղեկացրեց շինարարական աշխատանքներն իրականացնող «Բազալտշին» ՍՊԸ տնօրեն Լյովա Մարտիրոսյանը, հատկացված միջոցներով հիմնովին կավարտվի շինարարությունը, եւ նորակառույց թատրոնի շենքն այս տարվա երկրորդ կեսին կբացի իր դռները հանդիսատեսի առջեւ:

«Դրսի աշխատանքներն ավարտված են ամբողջությամբ, մնացել է կառուցել բեմը եւ դահլիճը՝ ակուստիկայով հանդերձ: Շինարարական աշխատանքներն արդեն սկսված են: Մեր կողմից կարվի հնարավորը, որպեսզի ամենասեղմ ժամկետներում հասցնենք շենքը հանձնել շահագործման: Արդի չափորոշիչներին համապատասխան թատրոնի շենքը անգնահատելի նվեր կլինի Գավառի թատերասեր հասարակայնությանը»,-ասաց Լ. Մարտիրոսյանը: